Fəlsəfə və Sosiologiya İnstitutunun alimləri “Dayanıqlı inkişaf üçün texnologiyalar: 4Sİ texnologiyaları və bulud həlləri” adlı tədbirdə iştirak ediblər

13 aprel 2023 -cü il tarixində AMEA Fəlsəfə və Sosiologiya İnstitutunun Beynəlxalq əlaqələr şöbəsinin müdiri fəl.ü.f.d. dosent Zöhrə Əliyeva və Etika şöbəsinin böyük elmi işçisi fəl.ü.f.d. Samirə Dadaşova İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM) və Türkiyənin “Bulutistan” şirkətinin birgə təşkilatçılığı ilə keçirilən “Dayanıqlı inkişaf üçün texnologiyalar: 4Sİ texnologiyaları və bulud həlləri” adlı tədbirdə iştirak ediblər.
Tədbirdə rəqəmsal biliyin artırılması, süni intellekt və kibertəhlükəsizlik məsələləri, müxtəlif sahələrdə bulud texnologiyalarının tətbiqi, Azərbaycan və Türkiyə arasında bulud texnologiyaları sahəsində təcrübəsi barədə müzakirələr aparılmışdır.
Dövlət qurumlarının, elm və təhsil müəssisələrinin, özəl sektorun nümayəndələrinin və mütəxəssislərin, eləcə də Türkiyənin 4Sİ texnologiyalarını tətbiq edən qabaqcıl şirkətlərinin iştirak etdiyi sessiyalarda bulud həlləri və bu həllərdən istifadənin üstünlükləri qeyd olundu, iştirakçıları maraqlandıran suallar cavablandırıldı.
Mərkəzi İstanbulda yerləşən informasiya xidmətləri ixracı (Cloud Services) üzrə ixtisaslaşmış “Bulutistan Qlobal” şirkətinin baş direktoru Önder Şahin və həmin şirkətin Azərbaycan üzrə ölkə müdiri Samir Nuriyev Fəlsəfə və Sosiologiya İnstitutunun alimləri ilə birgə əməkdaşlıq çərçivəsində tədbir keçirtməyi planlaşdırdılar.